| نجانے آج تم کیوں اس قدر ہی یاد آتے ہو |
| مری آنکھوں میں بن کر اشکِ غم فریاد آتے ہو |
| تمہارے ہجر میں دل کا نگر ویراں ہے مدت سے |
| مگر تم خواب میں کرنے اسے آباد آتے ہو |
| جوانی لٹ گئی ساری تمہارے انتظاروں میں |
| کہ اب مٹی کو بھی کرنے یہاں برباد آتے ہو؟ |
| پھنسا ہے جان کا پنچھی تمہاری زلف کی شب میں |
| اسے بس مارنے کو بن کے تم صیاد آتے ہو |
| تمہارے ظلم سہہ کر بھی لبوں پر مسکراہٹ ہے |
| ستمگر کس لیے کرنے نئی بیداد آتے ہو؟ |
| اکیلا چھوڑ کر مجھ کو گئے تھے تم سرِ محفل |
| تو اب کس کے لیے کرنے مری امداد آتے ہو؟ |
| تڑپتا ہے یہاں یہ شادؔ تنہائی کی راتوں میں |
| اسے تم کس لیے کرنے بھلا ناشاد آتے ہو؟ |
معلومات