| غزل |
| آنکھوں کے مے کدوں سے پلا دیجئے مجھے |
| یا بزم ناز ہی سے اٹھا دیجئے مجھے |
| گُل ہوں تو َزیب و زَینتِ گیسُو بنا ئیے |
| دَامن پہ دَاغ ہوں تو مٹا دیجئے مجھے |
| کچھ دیر رُوبَرُو مرے آ بیٹھئے حضور |
| رَخشندہ ماہ تاب بنا دیجئے مجھے |
| پر لطف آنچ آپ کے پہلو کے لمس کی |
| پہلو ملا کے ساتھ بٹھا دیجئے مجھے |
| چھوڑوں کبھی نہ ان کو نشیب و فراز میں |
| نازک نفیس ہاتھ تھما دیجئے مجھے |
| دَم ہی نکل نہ جائے کہیں حَبس سے مِرا |
| آنچل اُڑا کے تازہ َہوا دیجئے مجھے |
| بے مول، بے طلب جو سَرِ راہ مل گئے |
| یوں کیجئے کہ پھر سے گنوا دیجئے مجھے |
| معمول کے فریب سے بیزار ہو چکا |
| اِس بار ٹھیک ٹھاک دَغا دیجئے مجھے |
| دیرینہ ایک یاد ہی تو ہوں شہاب جی |
| سَیلِ رَواں کے ساتھ بہا دیجئے مجھے |
| شہاب احمد |
| ۳۰ جون ۲۰۲۵ |
معلومات