| رکتی سانسوں پہ سرِ شام تڑپنا کیسا |
| زندہ لاشوں کا سرِ عام یہ دھرنا کیسا |
| میں کلا کار ہوں غربت کی جہاں سازی کا |
| میری لرزش میں چھپی بھوک پہ ہنسنا کیسا |
| روز مرتا ہوں زمانے کی اداکاری سے |
| میری رنگت میں بسی زردی سے ڈرنا کیسا |
| جس کو چہرے پہ پڑی گرد سے ڈر لگتا ہو |
| اس کا آنکھوں کی گھٹی چیخ سے لڑنا کیسا |
| ایسا انساں جو بنے غیر کی چوکھٹ کا نشاں |
| اس کو پلکوں کے جھروکوں میں یوں رکھنا کیسا |
| جب کہ افکار تری بھوک مٹا سکتے نہیں |
| پھر بتا سوچ کی سولی پہ یہ چڑھنا کیسا |
| جس کی دیوار ہو سہمی کہ کہیں گر نہ پڑے |
| اس کا بارش کی فضا سے یوں لپٹنا کیسا |
| جس کو معلوم نہیں حال ترا کیسا ہے |
| اس کی خاطر تُو بتا روز یہ مرنا کیسا |
معلومات