| دل کا دلدار بنا ہے ترے رخسار کا تل |
| میری دھڑکن کی صدا ہے ترے رخسار کا تل |
| تیری رنگت میں بسا لگتا ہے جگنو جیسا |
| ایسی ست رنگ قبا ہے ترے رخسار کا تل |
| اُس کے بدلے میں، میں دے دوں یہ زمانہ سارا |
| ایسا تن من میں بسا ہے ترے رخسار کا تل |
| کونے ہونٹوں کے مچلتے ہیں اُسے چھونے کو |
| ایسی لب گیر عبا ہے ترے رخسار کا تل |
| جو بھی دیکھے اُسے پھر اور نہ کچھ بھائے اُسے |
| ایسا دلکش ہے جدا ہے ترے رخسار کا تل |
| چاند چہرے کو جو دیکھے تو گماں ہوتا ہے |
| دفترِ گل میں دبا ہے ترے رخسار کا تل |
| ایسا نخرہ وہ دکھاتا ہے کہ لگتا ہے مجھے |
| سب حسینوں کی ادا ہے ترے رخسار کا تل |
| اتنے رنگوں میں بٹا ہے کہ سبھی کہتے ہیں |
| شش جہت رنگِ حنا ہے ترے رخسار کا تل |
| مٹتے لگتے ہیں سبھی درد اُسے دیکھتے ہی |
| رب کی کیسی یہ عطا ہے ترے رخسار کا تل |
| عارضِ حسن پہ بیٹھا ہے کماں تانے ہوئے |
| بے بہا حسنِ خطا ہے ترے رخسار کا تل |
| چاند چہرے کو کئی رنگ عطا کرتا ہے |
| ایسی رم جھم کی گھٹا ہے ترے رخسار کا تل |
| مجھ سے پوچھے گا تو کہہ دوں گا سرے عام یہی |
| دکھ کے ماروں کی شفا ہے ترے رخسار کا تل |
| دن میں ملتا ہے وہ بھٹکے ہوئے سورج کی طرح |
| شب میں مہتاب زدہ ہے ترے رخسار کا تل |
| دل کے مندر کے کسی زینے پہ رہنے والا |
| اٹھتے ہاتھوں کی دعا ہے ترے رخسار کا تل |
معلومات