| بے قراری |
| یہ کیسی رت پلٹ آئی ہے پھر سے! |
| ہوا میں راکھ اڑتی ہے |
| مگر سینے کی ویرانی میں جیسے |
| وہی اک آنچ، اک مبہم سی خواہش |
| جنم لینے لگی ہے |
| کہیں گہری، بہت تاریک خندق میں |
| لہو پھر جاگ اٹھا ہے! |
| عجب تسخیر ہے اس وارفتگی میں |
| کہ دل خود مانگتا ہے چاک ہونا |
| بڑی مانوس سی لگتی ہے یہ تاراجیِ جاں |
| بظاہر عقل کہتی ہے کہ بچ جاؤ |
| مگر رگ رگ ترستی ہے |
| کہ پھر کوئی نیا، کوئی کڑا سا وار ہو جائے |
| ہمیں پھر شوق ہے مٹی میں ملنے کا |
| وہی رستے، وہی آبلہ پائی |
| وہی رسوائیوں کے زہر پینے کی طلب ہے! |
| یہ سب دیوانگی یونہی نہیں ہے |
| یہ خبطِ رائیگانی بے سبب کیسے ہو آخر؟ |
| کہ ہم سو بار لٹ کر بھی |
| اسی مقتل کے دروازے پہ کیوں واپس کھڑے ہیں؟ |
| کوئی تو ڈور ہے جو کھینچتی ہے! |
| کوئی تو ہاتھ ہے تاریک پردوں کے عقب میں |
| جو ہر ہارے ہوئے مہرے کو پھر سے چل رہا ہے |
| کوئی تو بھید ہے، جو کائناتوں کو نگل کر |
| ہماری ذات کی مٹھی میں چھپ کر ہنس رہا ہے! |
| یہ جو صدیوں پہ بھاری، اک ذرا سی بے قراری ہے |
| یقیناً... |
| کسی گہرے، کڑے اسرار کی پردہ داری ہے |
معلومات