| ہے خوش فہمی کسی دل میں بسا ہوں |
| کہ اپنے دام میں خود پھنس گیا ہوں |
| ہے گر دنیا بُری میں بھی بُرا ہوں |
| یہ میں نے کب کہا میں پارسا ہوں |
| مُقابل ہے جو آئینے میں اِک شخص |
| گُماں ہے اِس سے پہلے بھی مِلا ہوں |
| بُری عادت ہے بے خوابی بھی یارو |
| میں سپنوں میں بھی اکثر جاگتا ہوں |
| جُنوں جو ہے مرا خُود ساختہ ہے |
| وہ سمجھے ہیں میں پاگل ہو گیا ہوں |
| بَگولوں کی نظر میں بُجھ چُکا ہوں |
| دِیا اَندر ہی اَندر جل رہا ہوں |
| جو کھولوں لب تو دہشت گرد ہوں میں |
| رَہوں گر چُپ تو بولے بِک گیا ہوں |
| سُکوتِ مَرگ جو توڑا ہے میں نے |
| تو کہتے ہو بہت میں بولتا ہوں |
| بظاہر جو میں تُم پر سِیخ پَا ہوں |
| یہ اپنے آپ ہی سے میں خفا ہوں |
| بنائے جِس قدر ہتھیار میں نے |
| تباہی کی میں اپنی خود وجہ ہوں |
| مرے ناقد بھی اب کہنے لگے ہیں |
| میں اپنے آپ میں سب سے جُدا ہوں |
| سمانا تم بھی پہلے سے نہیں ہو |
| صدائے گم گزشتہ جانتا ہوں |
| نمک پاشی مرے زخموں پہ کیونکر |
| ہوں انساں میں یا کوئی سنترا ہوں |
| نہ ہی گھر کا رہا نا گھاٹ کا میں |
| ترے چکّر میں جب سے مبتلا ہوں |
| میں خاکی خاک سے نسبت ہے مجھ کو |
| فرشتہ ہوں نہ کوئی اپسرا ہوں |
| تجھے فرصت ملے تو دیکھ لینا |
| میں کب سے لین میں پیچھے کھڑا ہوں |
معلومات