| نقش فریادی ہے کس کی شوخیِ تحریر کا |
| کاغذی ہے پیرہن ہر پیکرِ تصویر کا |
| کاو کاوِ سخت جانی ہائے تنہائی نہ پوچھ |
| صبح کرنا شام کا، لانا ہے جوئے شیر کا |
| جذبہِ بے اختیارِ شوق دیکھا چاہیے |
| سینہِ شمشیر سے باہر ہے دم شمشیر کا |
| آگہی دامِ شنیدن جس قدر چاہے بچھائے |
| مدعا عنقا ہے اپنے عالمِ تقریر کا |
| بس کہ ہوں غالبؔ، اسیری میں بھی آتش زیر پا |
| موئے آتش دیدہ ہے حلقہ مری زنجیر کا |
بحر
|
رمل مثمن محذوف
فاعِلاتن فاعِلاتن فاعِلاتن فاعِلن |
اشعار کی تقطیع
تقطیع دکھائیں
معلومات