| صاف ہے ازبسکہ عکسِ گل سے گلزارِ چمن |
| جانشینِ جوہرِ آئینہ ہے خارِ چمن |
| ہے نزاکت بس کہ فصلِ گل میں معمارِ چمن |
| قالبِ گل میں ڈھلی ہے خشتِ دیوارِ چمن |
| برشگالِ گریۂ عشاق دیکھا چاہیے |
| کھل گئی مانندِ گل سو جا سے دیوارِ چمن |
| تیری آرائش کا استقبال کرتی ہے بہار |
| جوہرِ آئینہ ہے یاں نقشِ احضارِ چمن |
| بس کہ پائی یار کی رنگیں ادائی سے شکست |
| ہے کلاہِ نازِ گل بر طاقِ دیوارِ چمن |
| الفتِ گل سے غلط ہے دعوۂ وارستگی |
| سرو ہے با وصفِ آزادی گرفتارِ چمن |
| وقت ہے گر بلبلِ مسکیں زلیخائی کرے |
| یوسفِ گل جلوہ فرما ہے بہ بازارِ چمن |
| وحشت افزا گریہ ہا موقوفِ فصلِ گل اسدؔ |
| چشمِ دریاریز ہے میزابِ سرکارِ چمن |
بحر
|
رمل مثمن محذوف
فاعِلاتن فاعِلاتن فاعِلاتن فاعِلن |
اشعار کی تقطیع
تقطیع دکھائیں
معلومات