| ۔۔نعتِ رسولِ اکرم صلی اللہ علیہ وسلم۔۔ |
| حقیر لب سے بڑے در کی بات ہوجائے |
| حضور! چشمِ کرم ہو کہ نعت ہوجائے |
| خو و خیال میں بس جائے اُسوۂِ اعظم |
| دل و دماغ کو حاصل ثبات ہوجائے |
| رقم ہو نعت تو چھٹ جائے رنج کا بادل |
| پڑھوں درود تو ظلمت کی مات ہوجائے |
| ہو خار زار کو حاصل ادائے گل کاری |
| گر اُن کی یک نگَہِ التفات ہوجائے |
| ہو اس کے فقر کو حاصل لباسِ سلطانی |
| وہ جس کا داخلہ شہرِ نجات ہوجائے |
| وہاں ملے شہِ کوثر کے ہاتھ سے کوثر |
| یہاں پہ بند جب آبِ فرات ہوجائے |
| وہیں پہ چمکے مقدر کا مطلعِ آخر |
| وہیں حیاتِ درخشاں کی رات ہوجائے |
| وہ جس کوچاہیےغربت میں شوکتِ شاہی |
| وہ بندۂِ شہِ کل کائنات ہوجائے |
| اُنہیں کی نعت میں گم ہو خیال کی دنیا |
| اُنہیں کے نام پہ قرباں حیات ہوجائے |
| میں نعت پڑھتا رہوں نیند آئے اور احمد |
| زیارتِ رخِ مقبول ذات ہوجائے |
| ۔۔۔۔۔۔۔۔۔۔۔غلام احمد رضا نیپالی۔۔۔۔۔۔۔۔۔ |
معلومات