ڈاکٹر صاحب - اپنی اردو بہتر کرنے کے لیے کچھ سوال اس غزل سے متعلق پوچھنا چاہوں گا اگر آپ کو ناگوار نہ گزرے -
تلخ ہے یہ حقیقت فسانہ نہیں
== حقیقت اور فسانہ ایک دوسرے کے مخالف کے طور پہ استعمال ہوتے ہیں مگر آپ نے حقیقت کو تلخ کہہ کر اسے مخصوص کردیا - اب یہ عمومی بات تو نہ رہی - حقیقت تلخ ہو سکتی ہے تو فسانہ بھی تلخ ہو سکتا ہے - لہذا اب دونوں میں وہ عمومی تعلق تو رہا نہیں - تو کیا ایسا کرنا درست ہے؟

ان دُکھوں نے کبھی یار جانا نہیں
== میں نے پڑھا ہے کہ "میں نے کھانا کھانا نہیں" اردو میں غلط ہے ایسا پنجابی زبان میں کہا جاتا ہے - اردو میں کہنا ہوگا "مجھے کھانا نہیں کھانا" - اسی کلیے پہ "دکھوں نے کبھی جانا نہیں " بھی غلط نہیں ہوگا - کیا اسے ان دکھوں کو کبھی جانا نہیں ، نہیں ہونا چاہیئے ؟

آج اک ہے تو کل پھر کوئی دوسرا
شکوہ اس کا مگر لب پہ لانا نہیں
== یہاں یہ پتا نہیں چلتا کہ آج کیا ایک ہے اور کل کیا دوسرا ہوگا؟ تو پھر کس بات کا شکوہ لب پر نہیں لانا ہے - کیا یہ شعر صحیح ہوا؟

آگ سی اک لگی ہے مرے سینے میں
آبِ دنیا سے ممکن بجھانا نہیں
== آبِ دنیا گو تکنیکی اعتبار سے درست ہے - مگر اردو میں یہ اصطلاح کبھی اسستعمال نہیں ہوئی کسی شاعر یا ادیب نے نہیں کی - تو کیا کوئی نیا شاعر ایسی اصطلاح بنا سکتا ہے جو اردو میں مروج نہ ہو؟

بس کرو تم بھی زیرک قلم روک دو
داغ دل کے ہمیں سب دکھانا نہیں
== اردو میں عموما کہا جاتا ہے کوئی چیز ساری یا سب ہی ہمیں نہیں دکھانی - کوئی چیز "سب" ہمیں دکھانا نہیں تو استعمال نہیں ہوتا - تو کیا ایسے لکھنا درست ہے؟

شکریہ