| ہجر سے اس کے دلی وارفتگی کا شکریہ |
| حسرتِ دیدار تیری تشنگی کا شکریہ |
| گر انا ہے آپ میں تو ہم میں بھی کچھ کم نہیں |
| آپ کی اس بے سبب آزردگی کا شکریہ |
| اک سزائے تازیانہ کی وجہ جو بن گئی |
| اے دلِ نادان اُس دیوانگی کا شکریہ |
| بے حجابی آنکھوں میں ہے اور رخ پر بھی نقاب |
| تیری پردہ داری اور بے پردگی کا شکریہ |
| بندگی بے بندگی ہے سرکشی گر تجھ میں ہے |
| حضرتِ انسان ایسی بندگی کا شکریہ |
| میری صورت میرے آگے کر گئی جو ناشناس |
| آئنے سے دیکھتی بے چہرگی کا شکریہ |
| سِدْویؔ نادانی سہی پر عاشقی بھی کام ہے |
| عشقِ نامعقول سے وابستگی کا شکریہ |
معلومات