| ایک سلطان کی قیصری روٹی |
| کتنے مفلس نگل چکی روٹی |
| ہائے جابر کی بےحسی میں ہے |
| ظلم و جبروت دوسری روٹی |
| پیٹ بھرنے کا کھیل ہے سارا |
| فلسفہ سب پڑھا گئی روٹی |
| تر نوالوں کا حلق عادی تھا |
| شاہ نے خشک پھینک دی روٹی |
| یوں نصیحت اثر نہیں کرتی |
| قبل از پند شیخ جی روٹی |
| جیسے انساں ہو ایک کٹھ پتلی |
| یوں نچاتی ہے آدمی روٹی |
| تم نے ہم سے ذخیرہ اندوزو! |
| چھین لی ہے رہی سہی روٹی |
| ماں نے کاغذ پہ ایسے رنگ بھرے |
| سو گئی بیٹی چومتی روٹی |
| بھوکے کو جب نہیں ملی سِدْویؔ |
| نوحہ کرنے لگی بچی روٹی |
معلومات