| تو کیوں نہ دامنِ حُسین تھامے کائنات |
| حُسین بالیقیں ہیں جب امامِ کائنات |
| درود بھیجتا ہے آسمان ہر گھڑی |
| مساء و صبح ان پہ ہے سلامِ کائنات |
| سبب ہیں رنگ و بوئے گلستانِ دہر کا |
| ہوا انہی کے واسطے قیامِ کائنات |
| نبی کی آل سے ملا ہے امن کو فروغ |
| انہی کہ وجہ سے چلا نظامِ کائنات |
| جسے شرابِ حبِ اہلِ بیت مل گئی |
| اُسے لبھا نہیں سکے گا جامِ کائنات |
| بقائے دیں کا عترتِ نبی نے کل نصاب |
| لہو سے اپنے لکھ دیا بنامِ کائنات |
| وہ سیدِ شبابِ اہلِ خلد ہیں ، سُنو |
| خدا نے ان کے ہاتھ دی زمامِ کائنات |
| ٹھہر گئی ہے ظلمتوں بھری مہیب شب |
| لبِ فرات ہو چکی ہے شامِ کائنات |
| کلامِ رب سُنا رہے ہیں نیزے پر حُسین |
| عبث ہے اس کے بعد کُل کلامِ کائنات |
| حُسین ایک قطرۂِ کرم کا منتظر |
| کراچی میں قمرؔ ہے تشنہ کامِ کائنات |
| قمرآسیؔ |
معلومات