| کب پھونکِیے گا صُور کوئی بات کیجئے |
| کیا من میں ہے فُتُور کوئی بات کیجئے |
| بے وَجْہ ہم سے آپ نہ پہلو تہی کریں |
| اتنا بھی کیا غُرُور کوئی بات کیجئے |
| کوئی سنے نہ تو در و دیوار کے ہی کان |
| ہیں سامعیں وَفُور کوئی بات کیجئے |
| پاتے ہیں لوگ آپ کی صحبت میں سوجھ بوجھ |
| ہم بھی ہوں با شَعُور کوئی بات کیجئے |
| بے کل سماعتوں میں بھی رس گھولیے جناب |
| مجھ سے مرے حُضُور کوئی بات کیجئے |
| جاں سوز خامشی سے ملا اضطرابِ دل |
| آئے ذرا سُرُور کوئی بات کیجئے |
| امیدِ شر ہو غیر سے تو کیوں نہ خود کریں |
| ہم داخلی اُمور کوئی بات کیجئے |
| اظہار برملا کریں سرزد ہوا ہے کیا |
| کہیے مرا قُصُور کوئی بات کیجئے |
| ہر مُدَّعا بیاں کریں سِدْویؔ کے روبرو |
| کیوں غم سے دل ہے چُور کوئی بات کیجئے |
معلومات