خاص ہم پر ہُوا فضلِ رحمان ہے |
مومِنو آگیا ماہِ رمضان ہے |
جان میں عاصیوں کی پڑی جان ہے |
مومِنو آگیا ماہِ رمضان ہے |
سَحر و افطار کی برکتیں لوٹ لو |
رات دن خوب تم رحمتیں لوٹ لو |
برکتوں رحمتوں کی تو باران ہے |
مومِنو آگیا ماہِ رمضان ہے |
فرض کا اَجر سَتّر گُنا ہو گیا |
نفل کا اجر بھی فرض سا ہوگیا |
رب کا کتنا بڑا ہم پہ احسان ہے |
مومِنو آگیا ماہِ رمضان ہے |
کیف ہم کو عبادت کا اس میں ملے |
لطف کتنا تلاوت کا اس میں ملے |
نیکیوں کی طرف سب کا میلان ہے |
مومِنو آگیا ماہِ رمضان ہے |
سج گئی خلد بھی باب اس کے کُھلے |
اس مہینے میں دوزخ کو تالے لگے |
اس میں بخشش ہوئی کتنی آسان ہے |
مومِنو آگیا ماہِ رمضان ہے |
لیلتہ القدر کی ہے فضیلت بڑی |
طاق راتوں میں ہے رات یہ تو چُھپی |
اس میں نازل ہُوا رب کا قرآن ہے |
مومِنو آگیا ماہِ رمضان ہے |
کاش زیرکؔ کی بخشش کا سامان ہو |
موت طیبہ میں ہو ماہِ رمضان ہو |
پوری ہو یہ دُعا ماہِ غفران ہے |
مومِنو آگیا ماہِ رمضان ہے |
معلومات