.jpg)
| سچا پیار اے سچ دا چانن |
| رَب دا پیار اے حق دا چانن |
| سچے پیار نُوں آنچ نہ آوے |
| رَب دا پیار کوئی جانچ نہ پاوے |
| پیار نُوں پیار دے نال پہچانو |
| پیار تے رَب نُوں وَکھ نہ جانو |
| پیار اے موتی، پیار خزانہ |
| کُنْ تُوں پَہلاں، بہت پُرانا |
| پیار ہے ازلی اِک پروانہ |
| اپنے حُسن دا آپ دیوانہ |
| میم دا بُرقع پیار نے پایا |
| بن کے پیار محمدؐ آیا |
| پیار نے صورت تَد ہے پائی |
| میم نے کملی جَد ہے پائی |
| میم دے پیار وچ کامل رَچّے |
| عاشق، عارف، مجنُوں نَچّے |
| اَلف نے اپنا آپ سجایا |
| سر تے میم دا تاج بنایا |
| کَنْزِ مَخْفی میم دے کول اے |
| حٰمٓ دا سہرا وی انمول اے |
| میم دی شاہی، راج الٰہی |
| عرش و کُرسی، تاج الٰہی |
| اَلف اللہ دی میم دے نال اے |
| پیار دی کیڈی سوہنی چال اے |
| اَلف دے نال اے میم مکمل |
| میم دے نال تکوین مکمل |
| الف اے باطن، میم اظہار اے |
| میم محمدیؐ، حق دا پیار اے |
| سچے پیار نے سچ ہے کہنا |
| سچے پیار نُوں رَب ہے کہنا |
معلومات