| اک شان سے جب رشکِ قمر بات کرے گا |
| جل آتشِ الفت میں شرر بات کرے گا |
| نَے دست و شکم دل بھی وہاں بول اٹھیں گے |
| نَے خاک ہی اس روز تو زر بات کرے گا |
| سلطانی نہ حشمت ہی تری باقی رہے گی |
| دن حشر کے محکوم نڈر بات کرے گا |
| جو شخص مجھے ملنے کو تیار نہیں آج |
| تصویر سے کل شام و سحر بات کرے گا |
| محفل سے مجھے گو کہ نکالا ہے عدو نے |
| اب اس سے مرا قلمی ہنر بات کرے گا |
| پتھر بھی پگھل جائے گا گفتار سے تیری |
| اک بار تحمل سے اگر بات کرے گا |
| لب بستہ ہیں افلاس زدہ ہم کہ یہاں پر |
| کیا عالمِ غربت میں ہنر بات کرے گا |
| ہر آنکھ یہاں روئے گی سن کر مرے نالے |
| لفظوں میں مرا سوزِ جگر بات کرے گا |
| جب شہرِ خموشاں میں رہے شور و تماشا |
| کیا سِدْویؔ کوئی بندہ بشر بات کرے گا |
معلومات