| خدا سے دین سے رکھا اگر کنارا ہے |
| کمایا حضرتِ انسان نے خسارا ہے |
| منافقت ہے تو لا ریب تیری قسمت میں |
| ملال و رنج ہے اور اضطراب سارا ہے |
| نجات ان سے مودت بغیر ناممکن |
| نبی ﷺ کی آل تو جنت کا استعارا ہے |
| حزینِ کرب و بلا کر اطاعتِ مولا (ع) |
| نجف ہے حیلۂِ تسکین استخارا ہے |
| الٰہی رحم ہو حسنین پاک (ع) کے صدقے |
| عزیز تر تھے لحد میں جنہیں اتارا ہے |
| الٰہی سن لے صدائیں غموں کا مارا ہوں |
| ترا میں بندہ ہوں مجھ کو ترا سہارا ہے |
| ق |
| خدایا اوج پہ پہنچا نبی ﷺ کی چاہت میں |
| ابھی زوال سے ابھرا مرا ستارا ہے |
| تمام عمر رہا سِدْویؔ ناسپاس مگر |
| نزع کے وقت فقط لا الہٰ پکارا ہے |
معلومات