| پہلے ہو جا پارسا پھر نعت لکھ |
| لفظوں کی مالا بنا پھر نعت لکھ |
| تھام خامہ اور خدا کا نام لے |
| ان کے غم میں ڈوب جا پھر نعت لکھ |
| دیکھ کیسے ملتی ہے آسودگی |
| چل نبی سے لو لگا پھر نعت لکھ |
| پاس دینا ہے تجھے اس بات کا |
| پہلے پیدا کر وفا پھر نعت لکھ |
| ختمِ مرسل کے عدو کو دے لگام |
| نعرہ مومن کا لگا پھر نعت لکھ |
| دنیا کیا لوح و قلم بھی ہیں ترے |
| کر محمد سے وفا پھر نعت لکھ |
| عشق کی شمعیں جلانے کے لئے |
| خون دل پہلے جلا پھر نعت لکھ |
| بے خطر تھا عشق کودا آگ میں |
| ایسے ارشدؔ ڈھنگ لا پھر نعت لکھ |
| مرزاخان ارشدؔ شمس آبادی |
معلومات