| اک محروم زمانے بھر کا |
| سرد ٹھٹرتی ہواؤں میں |
| رات کی گہری تاریکی میں |
| تشنہ خوابوں کا ڈھونے بوجھ |
| ہاتھ میں سگریٹ تھام کے تنہا |
| گوشہ نشینی چھوڑ کے نکلا |
| کان میں کوئی قہقہہ گونجا |
| سوچ کی دھارا نے رخ بدلا |
| کیسا ہجوم تھا چاروں جانب |
| ایک گروہ میں حاجی صاحب |
| دوجے گروہ میں ناصب غاصب |
| اور وہ تنہا مثلِ ثاقب |
| چلتے چلتے دیکھ رہا تھا |
| دور گگن میں چاند گہن ہے |
| خوش گپیوں میں لوگ مگن ہیں |
| سگریٹ پھونکتے سوچ رہا تھا |
| رات کے پل یہ کیسی جگن ہے |
| اس کے اندر کیسی اگن ہے |
| لوگوں کے سنگی ساتھی ہیں لیکن |
| اس سے کسی کی گوئی نہیں ہے |
| انساں گریزاں بخت پریشاں |
| تنہا جاگے سوئے تنہا |
| اس کا سہارا کوئی نہیں ہے |
| کرتا کوئی دل جوئی نہیں ہے |
| شور سے پھر بے حال مسافر |
| گوشے میں اپنے واپس پلٹا |
| اپنے خلوت خانے پلٹ کر |
| آئنے سے یہ پوچھ رہا تھا |
| اے سِدْویؔ اے گوشہ نشیں |
| تنہائی کا سبب بتا دے |
| تو نے دنیا کو چھوڑا ہے |
| یا رخ دنیا نے موڑا ہے |
| توڑنے والے لوگ تھے یا پھر |
| تو نے خود کو توڑا ہے |
| دوڑا بخت گھوڑا یا خود |
| دوڑایا تو نے گھوڑا ہے |
معلومات