| اے مری عمرِرواں بچپن میں چل |
| خوبصورت تھا سماں بچپن میں چل |
| گود میں ماں کی مجھے تُو ڈال دے |
| چین ملتا تھا جہاں بچپن میں چل |
| باپ کی اُنگلی کو پھر میں تھام لُوں |
| ڈھونڈتا ہُوں سائباں بچپن میں چل |
| تب بہاریں کس قدر جوبن پہ تھیں |
| اب تو چھائی ہے خزاں بچپن میں چل |
| بھول جاتے تلخ باتیں آن میں |
| اب وُہی گزریں گِراں بچپن میں چل |
| یاد آتے ہیں دَر و دیوار سب |
| مٹ گئے اُن کے نِشاں بچپن میں چل |
| موت کی آغوش میں جو سو گئے |
| اُن پہ رب ہو مہرباں بچپن میں چل |
| اس سے پہلے کہ پھٹے زیرکؔ تِرے |
| دل کا وہ آتِش فِشاں بچپن میں چل |
معلومات