| رہبر ہیں اَب رہزن دیکھو |
| یعنی سب ہیں دُشمن دیکھو |
| فُرقت میں یوں بَرسی آنکھیں |
| جیسے بَرسے ساون دیکھو |
| قسمت کا ہے مارا دہقاں |
| بجلی ڈھونڈے خرمن دیکھو |
| اُجڑے ویراں سُونے سُونے |
| ہوگئے سارے گلشن دیکھو |
| خوں روئی ہیں آنکھیں میری |
| میرا تَر ہے دامن دیکھو |
| مجھ کو جاں سے پیارا تھا وہ |
| جاں کا جو ہے دشمن دیکھو |
| چَندا جیسا اس کا چہرہ |
| آنکھیں بھی ہیں روشن دیکھو |
| غیروں میں جو دیکھا اس کو |
| جَلتا ہے اب تَن مَن دیکھو |
| ان کو دیکھے عرصہ گزرا |
| ہو جائیں اب دَرشن دیکھو |
| دل دھڑکائے ہر دَم میرا |
| پایل کی یہ چھَن چھَن دیکھو |
| اُکھڑا اُکھڑا ساجن میرا |
| ایسی میری اُلجھن دیکھو |
| تَک تَک کر اب اس کی راہیں |
| آنکھوں میں ہے سوجن دیکھو |
| آخر اک دن ساغر ہوں گی |
| اس کی باہیں مسکن دیکھو |
معلومات