.jpg)
| تِرے عِشق سے مِلی ہے، مُجھے خُود کی آشنائی |
| رَہے عاشقی سلامت، رَہے تیری پیشوائی |
| تِرا عشق ہے حقیقی، تَرا جام کربَلائی |
| مِرے خواجہ تیری نِسبت، رَہِ عشقِ مصطفائی |
| تِرا آستاں ہے روشن ، تِرے عِشق کا مُنارا |
| کی جَبین سائی جس نے، مِلی اُس کو روشنائی |
| تِرے میکَدے سے خواجہ، مِلے جامِ مُصطفائی |
| یِہی تَشنگی اے ساقی، تِرے میکَدے پہ لائی |
| نہ مِلا سکون مُجھ کو، نہ کہیں قَرار پایا |
| تِرے آستاں پہ آکے، مِری رُوح مُسکرائی |
| میں وہ خاکِ آستاں ہوں، جو کَبھی نہ سَر اُٹھائے |
| رَہوں تیرے زیرِ پَا میں، یہ رِقاب ہے جُھکائی |
| نہ میں دیکھوں غَیر کوئی، نہ خِیالِ غَیر لاؤں |
| یہی میری بَندگی ہے، یہی میری پارسَائی |
| مِری زِندگی کا مَقصد، تِرا ذکرِ جاوِدانی |
| مِری بَندگی کا حاصِل، تِرے عشق میں فَنائی |
| ہے اَزل سے میرا ناتا، تِری ذاتِ با وَفا سے |
| رَہے تا اَبد خُدارا، یُوں ہی تیری ہم نَوائی |
| تِری دِید نے سُجھائی، یہی ہم کو رَمزِ کثرت |
| ہے کہاں کِسی نَظر کو، تابِ دیدِ کِبریائی |
| نہ نِشان ہے دُوئی کا، نہ ہی رَنگ ہے خُودی کا |
| تِرا رَنگ ہے اُلُوہی، نہ سمجھ سَکے خُدائی |
| تُمہی سَر تا پَا ہو حافظؒ، تِرے مَن مُرادؒ بیٹھا |
| ہوئی بے نَقاب مُجھ پر، تِری ایسی خُوشنُمائی |
| دَمِ آخری بھی میرا، ہو نِثار تُجھ پہ خواجہ |
| یہی میری آرزو ہے ،کَروں تُجھ پہ جاں فِدائی |
| یہ غُلام ہے سَوالی، دیکھو اِس کی خَستہ حَالی |
| نہ یہ دَر سے جائے خَالی، مِلے اِس کو حَق رَسائی |
معلومات