| ظلم جب پھول پھل گیا لوگو |
| خاک چہروں پہ مل گیا لوگو |
| شاہ نے چار سکے کیا پھینکے |
| سب کا ایماں پھسل گیا لوگو |
| آہِ مظلوم پر نہ تم پگھلے |
| گرچہ پتھر پگھل گیا لوگو |
| تم دلاسا بھی دینے تب آئے |
| جب یہ دل خود سنبھل گیا لوگو |
| جس پہ ہم جاں نثار کرتے تھے |
| زہر دل کا اگل گیا لوگو |
| وقت نے رنگ جیسے ہی بدلے |
| رنگ سب کا بدل گیا لوگو |
| بے حیائی کے عام ہونے سے |
| ابنِ آدم بہل گیا لوگو |
| زندگی جس کو جھیلتے گزری |
| غم وہ مرنے سے ٹل گیا لوگو |
| غم نہ ہونے کا غم مسلط تھا |
| ہم کو یہ غم نگل گیا لوگو |
| دل کو ڈسنے لگی ہے تنہائی |
| سِدْویؔ بس آج کل گیا لوگو |
معلومات