| بہت قادر ہوں شامت کا میں مارا |
| سواۓ صبر کے پر کیا ہے چارہ |
| غصیلا ہے بہت وہ ماہ پارہ |
| چڑھا رہتا سدا ہے اس کا پارا |
| کوئی ہمدم نہیں کوئی سہارا |
| کوئی ساحل نہیں کوئی کنارہ |
| یوں کہنے کو تو ہے یہ دل ہمارا |
| مگر اس پر کسی کا ہے اجارہ |
| نہیں پھر جڑ سکا شيشہ گروں سے |
| ہوا دل ٹوٹ کر یوں پارہ پارہ |
| ہوس کیوں قصرِعالی شان کی تھی |
| کہ جب دو گز زمیں پر تھا گزارہ |
| دھڑا دھڑ بک رہا ہے میکدوں میں |
| مرا اس ماہ کا غم کا شمارہ |
| محبت ہے رواں اک بحر لیکن |
| نہیں اس بحر کا کوئی کنارہ |
| ابھی تک ڈھونڈتا ہوں میں خوشی کو |
| ہوئی یوں چھوڑ کر نو دو گِیارَہ |
| وفا نفسِ محبت کی حقیقت |
| محبت ہے وفا کا استعارہ |
| نہیں نادار کو چوری کا خدشہ |
| نہیں مفلس کو ہوتا ہے خسارہ |
| تنوع ہر ادا میں اس قدر ہے |
| کروں ہر بات پر میں استخارہ |
| ہمارے بالوں میں اٹکا ہوا ہے |
| تمہارے کان کا کیوں گوش وارہ |
| گرانی ہو گئی ہے اتنی قادر |
| بڑی مشکل سے ہوتا ہے گزارہ |
معلومات