.jpg)
| سُوئے سُبحان بُلانے کے لئے آپؐ آئے |
| ہم کو رَحماں سے مِلانے کے لئے آپؐ آئے |
| مُنعکس آپؐ کی صُورت میں ہُوا وَجْہُ اللہ |
| حُسنِ جانان دِکھانے کے لئے آپؐ آئے |
| آیا قُرآں تو زُباں گُل ہوئی شیطانوں کی |
| ہم کو قُرآن سِکھانے کے لئے آپؐ آئے |
| آپؐ کو اس لئے قُرآن پُکارے ہے حَریص |
| ساری اُمت کو بچانے کے لئے آپؐ آئے |
| جب تلک آپؐ ہیں ہم میں، نہ عذاب آئیں گے |
| یہ ضمانت بھی دِلانے کے لئے آپؐ آئے |
| نُورِ اَقدس نے نکالا ہے بَھنور سے ہم کو |
| بحرِ ظُلمات مِٹانے کے لئے آپؐ آئے |
| آپؐ کی دید حقیقت میں وِصالِ حق ہے |
| ہم کو معراج کرانے کے لئے آپ آئے |
| ہجر کی آگ میں جلتے ہوئے پروانوں کو |
| جام کوثر کا پِلانے کے لئے آپؐ آئے |
| حُسنِ ظن ہے یہ مِرا اور یقیں ہے کہ مُجھے |
| کالی کملی میں چُھپانے کے لئے آپؐ آئے |
| میرے خوابوں میں جو آئے تو کہا ہے دل نے |
| مُجھ کو اپنا ہی بنانے کے لئے آپؐ آئے |
| کوئی محروم نہیں ہے دَرِ رحمت سے غُلام |
| رَب کی رحمت کو لُٹانے کے لئے آپؐ آئے |
معلومات