| عمر بھر ساتھ نبھائے تو کوئی بات بنے |
| یا کبھی پاس نہ آئے تو کوئی بات بنے |
| پرفتن دہر میں ہر سمت جفا کاری ہے |
| فصلِ الفت تو اگائے تو کوئی بات بنے |
| عارضی ان کی محبت مجھے منظور نہیں |
| دائمی عشق رچائے تو کوئی بات بنے |
| چائے میں زہر ملا دے تَو کوئی رنج نہیں |
| پر تُو ہنس ہنس کے پلائے تَو کوئی بات بنے |
| شہر پھولوں سے سجا دینا تماشہ ہے فقط |
| رنگِ گل چہروں پہ چھائے تو کوئی بات بنے |
| خوش سخن ہے تو دکھے حسن مقالی تجھ میں |
| اپنے دشمن کو ہنسائے تو کوئی بات بنے |
| مفلسی تیری تجھے جھکنے پہ مائل نہ کرے |
| عزتِ نفس کمائے تو کوئی بات بنے |
| ہم پہ الزام دھرے بات مگر سچی کرے |
| وہ نہ بے پر کی اڑائے تو کوئی بات بنے |
| گرچہ تمثیلِ سخن زود اثر ہے سِدْویؔ |
| آدمی دل میں بسائے تو کوئی بات بنے |
معلومات