کوئی خواب ٹوٹا کوئی ساتھ چھوٹا تو میں چپ رہا

کوئی آہ نکلی کوئی آنسو نکلا تو میں چپ رہا

وگرنہ قیامت بپا تھی شبِ ہجر میں جب کبھی

تری یاد آئی ترا دھیان آیا تو میں چپ رہا

کئی مدتوں بعد اس دشتِ خواہش میں جب پھر کبھی

کوئی ابر برسا کوئی جسم ترسا تو میں چپ رہا

وہ جس کھڑکی پہ پہلے بھی پنچھی چہکے تھے دل دھڑکا تھا

پھر اس دل کی کھڑکی پہ جب پنچھی چہکا تو میں چپ رہا

یں کیسے بتاتا کہ تو میرا کیا ہے میں کیا ہوں ترا

کسی نے ترے بارے میں جب بھی پوچھا تو میں چپ رہا

میں بے جان و بے حس سمندر کو تکتا رہا دیر تک

سرِ شام کوئی ستارا جو ڈوبا تو میں چپ رہا

یہ میرا جنوں تھا کہ شوق شہادت مرا کیا خبر

جب اس نے مرے دل میں خنجر اتارا تو میں چپ رہا

وہ جب ایک دم اترا تھا دل میں کچھ حشر سا تھا بپا

وہ آہستہ آہستہ جب دل سے اترا تو میں چپ رہا