| کل گزری مری نظروں سے تحریر کسی کی |
| اور گھوم گئی آنکھوں میں تصویر کسی کی |
| وا کر گئی ہے مجھ پہ وہ ماضی کے دریچے |
| شانوں پہ گری زلفِ گرہ گیر کسی کی |
| ہوتا ہے کسی لمس کا احساس مسلسل |
| لگتا ہے کہ یادیں ہیں بغلگیر کسی کی |
| میں کیا کروں اس کا کبھی سنتا نہیں میری |
| دل میرا نہیں جیسے ہے جاگیر کسی کی |
| اک عرصہ ہوا ترکِ تعلق کیے اس کو |
| پیروں میں مرے اب بھی ہے زنجیر کسی کی |
| بدلے نہیں میرے ابھی حالات مبشر |
| تقدیر بدل دیتی ہے تدبیر کسی کی |
معلومات