| کوئی منزل نہ رہ گزر مجھ میں |
| بے سفر کرتا ہے سفر مجھ میں |
| شاخِ جاں پر کھلے ہیں وجد کے پھول |
| اس نے یوں کر لیا ہے گھر مجھ میں |
| یا تو کچھ بھی نہیں رہا باقی |
| یا سمٹ آیا بحر و بر مجھ میں |
| میں کہ اک سانحہ ہوں لمحوں کا |
| ہوتا کیا کیا ہے لمحہ بھر مجھ میں |
| میری ہی جستجو میں شام و سحر |
| پھرتا ہے کون در بہ در مجھ میں |
| اب وہ آرامِ جاں وہ نیند کہاں |
| کھلتے ہیں زخم رات بھر مجھ میں |
| بس کنارے کنارے چلتی ہو |
| کبھی تو میری جاں اتر مجھ میں |
| عشق خنجر چلا ہے ایسے کہ بس |
| خوں سے ہے ذرہ ذرہ تر مجھ میں |
| موسمِ گل کے باوجود رہے |
| باغ کتنے ہی بے ثمر مجھ میں |
| مجھ میں ہی پھر ہوا یہ قصہ تمام |
| مل گیا اپنا ہم سفر مجھ میں |
| سر جکیں گے ہزار قدموں میں |
| سایہ بن کے کبھی ٹھہر مجھ میں |
| اب تو آئے کوئی مرے اندر |
| اب تو کھلنے لگے ہیں در مجھ میں |
| اب تو مجھ میں کوئی نہیں رہتا |
| اب تو کر کوئی شب بسر مجھ میں |
معلومات