| رنگ وہ زندگی میں پھر سے سہانے آتے |
| خط لکھے ان کے ہمیں پھر سے پرانے آتے |
| خوشبو پھولوں سے چرا کے جو ہوائیں آتیں |
| ہم پہ وہ پہلی محبت کے زمانے آتے |
| وہ ذرا تیکھی سی نظروں سے ہمیں دیکھتے جو |
| اپنے حصے بھی کئی کھوئے خزانے آتے |
| باقی پہچان نہیں اپنی کہو لوگوں سے |
| اس بہانے ہی سہی یار منانے آتے |
| ہاتھ میں کب سے لئے بیٹھے ہیں ساغر دل کا |
| کاش آنکھوں سے وہ مے ہم کو پلانے آتے |
| مانتے ہم بھی کئے وعدوں کی سچائی کو |
| ڈوبتا چاند بھی گر شب کو سجانے آتے |
| ہجر میں سرد ہوئے جاتے ہیں جذبے شاہد |
| ایسی رت میں وہ کوئی آگ لگانے آتے |
معلومات