| تمام دوستوں کے سنگ مسکراتا ہوا |
| میں خود کو دیکھوں مدینے کی سمت جاتا ہوا |
| ہزاروں آپ کے احسان ہیں شفیعِ اُمم |
| کسی نے آپ کو دیکھا نہیں جتاتا ہوا |
| گلے لگا لیا آخر خیالِ طیبہ نے |
| اکیلا رہ گیا تھا ہاتھ جب ہلاتا ہوا |
| درود پڑھنے کی لذت سے میں ہوا محظوظ |
| کھجور ان کی لگائی ہوئی چباتا ہوا |
| عطا جو ہوتا مجھے اذنِ حاضری آقا |
| مواجہ چومتا سب سے نظر بچاتا ہوا |
| حبیبِ باری تعالیٰ ہیں دافعِ آلام |
| انہی کا اسم ہے رنج و محن مٹاتا ہوا |
| ہے ان کا فضل کہ جاتا ہوں جانبِ مسجد |
| قدم قدم پہ کئی نیکیاں کماتا ہوا |
| بقایا عمر ہو مسکن قرینِ گنبدِ سبز |
| متاعِ زیست رہوں کب تلک گنواتا ہوا |
| قمرؔ مدینے کے اندر الٰہی پایا جائے |
| ہمیشہ مدحتِ شاہ اُمم سناتا ہوا |
| قمرآسیؔ |
معلومات