| کیا ہو جواد سے گدا ناراض |
| سو نہ میں وقت سے ہوا ناراض |
| اسے بھی چاند سے رہا شکوہ |
| خود سے میں بھی سدا رہا ناراض |
| تُو خفا ہے تو ایسا لگتا ہے |
| دل سے دھڑکن ہے دوستا ناراض |
| میں نے بچوں کو روٹھنے نہ دیا |
| ہو نہ جائے کہیں خدا ناراض |
| جیسے کرتا ہے خود کشی کوئی |
| اسے دانستہ کر دیا ناراض |
| وہ کہ ہوتا کبھی نہیں تھا خوش |
| میں کہ ہوتا کبھی نہ تھا ناراض |
| دیکھنا خود مجھے منائے گا |
| لوٹ آئے گا جب مرا ناراض |
| دیکھ کر حال جینے والوں کا |
| زندگی سے ہوئی قضا ناراض |
| لکھ رہا کیوں نہیں حقیقتِ زیست |
| ہے قمرؔ سے قلم بجا ناراض |
| قمرآسیؔ |
معلومات