| دریا سمجھ رہے ہو سمندر ہے، اک قفس |
| شب زاد غم کی شام، برابر ہے اک قفس |
| آزاد ہوں میں مجھ کو غلامی نہیں قبول |
| سر کو جھکائے رکھنے سے بہتر ہے اک قفس |
| ذہنی اسیر پا کے رہائی کریں گے کیا؟ |
| کم فہم بزدلوں کا مقدر ہے اک قفس |
| مشغول اپنی دھن میں ہیں کیا نفسا نفسی ہے |
| بے اعتنائی عام ہے گھر گھر ہے اک قفس |
| ہر اک خیال دور ہر اک لفظ گمشدہ |
| یہ بسترِ فراق سراسر ہے اک قفس |
| اندازِ دلربائی ہے مثلِ ملالِ ہجر |
| مفلس غزل کا حرفِ مکرر ہے اک قفس |
| اک قہقہے کی گونج سلاخیں ہلا گئی |
| بس دنگ میں نہیں متحیر ہے اک قفس |
| سِدْویؔ یہاں سے عشق کی توہین ہے فرار |
| تم خوش نصیب ہو کہ میسر ہے اک قفس |
معلومات