| چُم کے تلیاں ہیر نے مینوں، سرگی آن جگایا |
| بھاگ بھری نے بھر کے لوٹا، ہتھ مُنہ آپ توایا |
| کوئی نہ دیوے مان اجیہا، قسمت تیری چنگی |
| لبھ گئی تینوں رب دی قسمیں، خدمت گار اے بندی |
| ریجھاں نال پکاکے کھانڑے، دستر خوان سجایا |
| میرے رانجھن کر لے سحری، پیار دے نال بٹھایا |
| اپنے ہتھاں نال کھوایا، لچھے دار پراٹھا |
| گھی تے شکّر مکّھن پیڑا، اُتّوں ساگ جماں دا |
| ناگ زہریلا دُنیا والا، ڈنگ نہ لیوے تینوں |
| نیک سیانڑے لوک خُدا دے، مَتّاں دیندے مینوں |
| لَکّھ سواد اے دُنیا اندر، جنّت دا کی دَسّاں |
| ہِک تُوں وَدھ کے ہِک اے نعمت،نہراں باغ تے حُوراں |
| کر لے راضی رب نُوں زیرکؔ، رکھ کے روزے سارے |
| ایہہ مہمان خدا دا آیا، یارو چار دیہاڑے |
معلومات