| نہ دل میں انا ہے نہ کوئی حسد ہے |
| نہ فطرت میں بغض و عداوت نہ کد ہے |
| ہمیشہ سبھی کا بھلا ہی کیا ہے |
| بھلے نیک ہے یا بھلے کوئی بد ہے |
| کسی کی جو مشکل کو آسان کر دے |
| خدا اس کی مشکل میں کرتا مدد ہے |
| میں دل چیر کر دوں دلیل محبت |
| کہ اس نے محبت کی مانگی سند ہے |
| جنوں عشقِ دلبر نے ایسا جگایا |
| ہوئی چاک میری قبائے خرد ہے |
| دلِ ناتواں کب تلک ہجر کاٹے |
| تغافل کی ظالم ترے کوئی حد ہے |
| کسی سے وفا وہ بھلا کیا کرے گا |
| وفا کے جو معنی سے ہی نابلد ہے |
| خدایا غضب یا کوئی مصلحت ہے |
| مری ہر دعا ہو رہی مسترد ہے |
| کسی روز بسنا ہے زیرِ زمیں بھی |
| مرے نام کی بھی کہیں پر لحد ہے |
| سحابؔ اس جہاں میں ہر اک شے ہے فانی |
| کہ لافانی بس اک خدائے احد ہے |
معلومات