اصلیُ النسل تو شیطاں کے مقابل آئیں |
نسلِ شیطاں ہیں جو یزداں کے مقابل آئیں |
پارسائی کا بھرم ان کی یقیناً کھل جائے |
گر فرشتے کبھی انساں کے مقابل آئیں |
حُسنِ حورانِ جناں کا نہیں منکر لیکن |
ان میں ہمت ہے تو جاناں کے مقابل آئیں |
شدت کیف و تلطف سے نہ پاگل ہو جائیں |
کس طرح گل تری مسکاں کے مقابل آئیں |
نام جانے کا نہ لے گا وہ کبھی بھی ہرگز |
آپ کے کھانے جو مہماں کے مقابل آئیں |
ناز کرتے ہیں ستارے جو ضیا پر اپنی |
یار کی چشمِ فروزاں کے مقابل آئیں |
خنجر و تیر تفنگ آپ کو بھولیں آسیؔ |
تیغِ بے رحم سی مژگاں کے مقابل آئیں |
معلومات