| غم کی آغوش میں اے جان اتر جاؤں گی |
| زخم کھا کھا کے ترے ہجر میں مر جاؤں گی |
| تیرا احسان بھلا کر میں کدھر جاؤں گی |
| ”تیرا احسان بھلاؤں گی تو مر جاؤں گی“ |
| تیرا احسان مرے یار نہیں بھولوں گی |
| اپنی سب خوشیاں ترے نام پہ کر جاؤں گی |
| زخم سہ لوں گی جو بخشے گا زمانہ مجھ کو |
| اور دامن ترا خوشیوں سے میں بھر جاؤں گی |
| خستہ حالی پہ مری ہو نہ پریشاں ہمدم |
| تیری صحبت میں رہوں گی تو نکھر جاؤں گی |
| تم ہی مرہم ہو مرے آؤ عیادت کے لیے |
| ان طبیبوں سے میں کچھ اور بکھر جاؤں گی |
| میری ہر سانس ترے نام لکھی ہے محسن |
| تو اگر بچھڑا جو مجھ سے تو بکھر جاؤں گی |
| کیا کہوں کیسا فسوں ہے ترے ہاتھوں میں صنم |
| مجھ کو بس ہاتھ لگادے تو سنور جاؤں گی |
| تو کہیں دور کے دریا کا کنارہ ہو جا |
| میں کسی پاس کے صحرا میں بکھر جاؤں گی |
| ہاں مرے بخت میں ہیں ماں کی دعائیں پیہم |
| میں سمندر میں بھی ڈوبی تو ابھر جاؤں گی |
| آ کہ اک بار میں سینے سے لگا لوں تجھ کو |
| پھر تری یاد کے صحرا میں بکھر جاؤں گی |
معلومات