| جہاں جہاں بھی کوئی کربلا ، الم دے گی |
| نوید ، صبح کی ، ہر ایسی شامِ غم دے گی |
| سلگ رہا ہے جو ایمان دل کی گلیوں میں |
| یقیں ہے گرمئِ الفت ، عمل کو دم دے گی |
| دھنک جو نکلے کبھی بارشوں کے موسم میں |
| تو رنگ ، روشنی کیا آسماں سے کم دے گی |
| صدائے کن فیکوں پھر سنی فلک پر سے |
| یہ کائنات نئی کہکشاں جنم دے گی |
| بتوں کی دل میں جگہ ہی نہیں رہی باقی |
| تو زندگی ہمیں کیا ؟ چاہتِ صنم دے گی |
| کسی نے سوچا تھا ہو گی یہ میزبان ، زمیں ؟ |
| تمام جگ سے جو آئیں گے ، ہم قدم ، دے گی |
| جہاں میں پھیلتی جائے گی حق کی جب آواز |
| تو لمحہ لمحہ خبر ، سب کو دم بدم دے گی |
| سنبھال پائے گا کیسے کوئی بھلا دل کو |
| ہوا جو زلف کو لہرا کے پیچ و خم دے گی |
| جو شش جہت تری تصویر جائے گی طارق |
| شعور و فہم و فراست کو پھر قلم دے گی |
معلومات